حوار مع سياب حول الفكر ومآله

يوراميوم: كنت عم أتمشى بالشام بعد اجتماع بشركة الانترنت اللي مستلمة مواقع الشركة اللي عم اشتغل فيها وعم فكر بشغلة
 
سياب: اي
 
يوراميوم: حبيت شاركك فيها
 
سياب:؟
 
يوراميوم: هي مجرد فكرة
 
يوراميوم: أو استنتاج وصلتله :
 
سياب: شو هو
 
يوراميوم: نحنا فايتين على عصر ملامحه الفكرية عم تصيغها مجموعة من ال Tags و Keywords و المجتمعات الفكرية عم تنتقل لتقولب بقوالب الكترونية
 
سياب: اي
 
يوراميوم: كان من زمان الباحث ليوصل لمعلومة يستخدمها ببحثه العلمي يقرأ مئات الصفحات من الكتب أو لازم على الأقل يكون عنده مخزون مناسب معرفي ليخوض بدراسة ما
 
يوراميوم: هلق واحد مثل فلان أو علان على سبيل المثال بإمكانه وببعض الكلمات بمحرك بحث أنو يجيب المواد اللازمة ليقوم ببحث ما بيكتبه باحث خبير بمجال التقنية
 
سياب: صحيح
 
سياب: المعلومة صارت متاحة
 
سياب: بسهولة
 
يوراميوم: مو قصة متاحة بس.. صار في مين عم يدور على المعلومة ألك ويعطيك اياها بدون تفاصيل تأتي قبلها أو بعدها مرتبطة فيها جزئياً أو كلياً
 
سياب: بس هالشي ما بيعطيهم أفضلية لعمل بحث مميز يقدم شيء نوعي جديد
 
سياب: عدا معلومات مجمعة
 
سياب: اي كفي
 
يوراميوم: حتى الجزء من البحث اللي عم يتعلق بتجارب،  ممكن الواحد يتناوله من أحد المواقع ويقرأ فيه الفرض والنتيجة بس بدون الخوض بتفاصيل عملية التجريب
 
سياب: اي
 
يوراميوم: شايف أنو هذه المرحلة خطيرة ، ورح تحصر البحث العلمي بمجموعة ضيقة من الناس
 
سياب: من اي ناحية خطيرة
 
سياب: ومين هالمجموعة الضيقة ؟
 
يوراميوم: المجموعة اللي ما عم تستخدم الأدوات اللي عم يستخدموها المبتدئين بالبحث العلمي ، المدرسة القديمة بالبحث العلمي
 
يوراميوم: خطيرة لأنو هي الطريقة بالوصول للمعلومات ما بتخلي عندك وعندي مخزون معلوماتي بقدر ما بتعمل تشويش بالذهن
 
يوراميوم: هلق لما تقرأ معلومة بموسوعة الكترونية أو بموقع انترنت مابتهتم بأنك تحفظها لمجرد أنك بتعرف أنو هي موجودة وبإمكانك توصلها بأي وقت
 
سياب: اي كفي فكرتك
 
يوراميوم: وهلق بهالأيام كترانة المواقع اللي بتساعدك بأنك تخبي المعلومات أو الأخبار او المقالات بمكان واحد ألك
 
سياب: اي
 
يوراميوم: صرنا عم نجمع أكثر ما عم نستوعب
 
يوراميوم: وفي شغلة ببعض المواقع عم تتنامى وهي:
 
سياب: اي
 
يوراميوم: أنها عم تحوي مجموعة مفردات بنسميها Tags بتلخص المقال فيها، يعني مثلاً موضوع مثل لوحة المفاتيح والكرسي.
 
يوراميوم: بياخد Tags (كلمات دليلية) مثل “طرائف، تقنية، دعم كومبيوتر فني”
 
يوراميوم: ونمو Tags بالانترنت بيخلي الوصول للمعلومات دقيق أكثر وأكثر
 
يوراميوم: في بحوث هلق عم تصير مشان تخلي محركات البحث تستخدمها مشان تعطيك أكبر قدر ممكن من الدقة بالوصول لهدفك
 
يوراميوم: بس اختار الكلمات المناسبة بمحرك بحث ليستخدمها بالمطابقة مع ال tags بتقديم أجوبة كثير محددة ومطابقة لبحثك
 
سياب: أي، ما وصلت لفكرتك للآن
 
يوراميوم: عم يقتلوا البحث العلمي بهي الطريقة صارت أدمغة الناس حاوية على مجموعة من عناوين الانترنت بدلاً من المعلومات
 
سياب: كلام حلو
 
سياب: بس السؤال
 
سياب: برأيك توفر المعلومات بهالسهولة والقدر الكبير من اليسر
 
سياب: يأثر على طريقة تفكير الناس ؟
 
سياب: ولا يساعدهم كون المعلومات مهمة جدا لاي شخص
 
يوراميوم: أكيد بدل ما يقرأ واحد من الناس كتاب بيفهم آلية عمل نظام التشغيل مثلاً وهيكليته ..عم يستنوا لتصير معهم شي مشكلة ويحلوها والمصيبة أنو مابيحفظوا طريقة الحل بقدر ما بيحفظوها بمفضلة ما.. إغراء الوصول السريع للمعلومة عم يقتل رغبة الناس بالتعلم.
 
سياب: ممم
 
سياب: نقطة مهمة اللي تحكيها فعلا
 
يوراميوم: يا أخي مثلاً ما في داعي أقرأ أنا وأنت كتاب علم الزهور كاملاً بيكفي انو نقرأ عن زهرة ما  صفحة بالنت لأنو هذا مو مجالنا.. بس بالأمور اللي بصميم حياتنا مبادئ التاريخ .. الجغرافية .. الرياضيات .. الفيزياء .. كيف نشغل كومبيوترنا على الأقل.. والضربة الكبيرة أنو بهيك جو
 
يوراميوم: وبهيك أسلوب جديد .. بتفلح الميديا فلاحة رهيبة .. وبتقدم المعلومة لجمهور من هي النمرة وكأنها كلام منزل .. بس أنت عليك أنك تتبنى قناة إخبارية معينة وبيصير كلامها منزل.
 
سياب: بتقصد انو المرجعية العلمية تتحول لتصير ولاء لموقع ما او جهة إخبارية
 
يوراميوم: تمام
 
سياب: كالولاء للمرسيدس انها الأفضل حتى لو كان هالأمر مو دقيق
 
يوراميوم: اكيد
 
سياب: طيب
 
يوراميوم: ياعيني عليك
 
سياب: ما الحل برأيك
 
يوراميوم: الاعلان لسه أكثر أثر من الخبر
 
سياب: اي
 
يوراميوم: أي حل رح يكون سباحة ضد التيار
 
سياب: اذا
 
سياب: السباحة مع التيار؟
 
سياب: شرط تقديم معلومة موثقة
 
يوراميوم: على الاقل يجب التصريح عن هذا الشي مشان الجيل الجديد
 
سياب: هو بصراحة اللي تحكيه مضبوط كتير
 
سياب: الزائد اخو الناقص
 
سياب: اللي يجي بسهولة يروح بسهولة
 
سياب: وعم يصير الهم هو المعلومة فقط
 
سياب: بمعنى الثمرة النهائية لسلسة طويلة من الأبحاث
 
سياب: وهيك مع الوقت
 
سياب: تموت روح البحث عن الناس (مع انها ميتة على الأقل عنا )
 
يوراميوم: صحيح
 
سياب: ويصيرون حاوية لمعلومات مو بالضرورة تكون صحيحة وغالبا ما تكون متضاربة ومشوشة
 
سياب: لانو ما عنا معرفة بالكيفية اللي هالآخر توصل الها فيها
 
يوراميوم: كم مرة سمعت بالأخبار خبر بيشبه أنو العلماء توصلوا لحل لموضوع السرطان وبتقعد تقرأ وبالآخر مابيتغير شي بالحياة المعاشة؟
 
يوراميوم: تمام
 
سياب: كتير
 
سياب: يعني عم تقول انو العلم
 
سياب: واخبارو ومنهجياتو من حيث النتائج
 
سياب: اصيح مثلو مثل الأخبار السياسية والتحليلات
 
سياب: للمتلقي
 
يوراميوم: نحنا نفدنا مشان هيك مو حاسين بالشغلة بس الجيل الجديد … هو المتأثر الأكبر
 
يوراميوم: ومشوش وضايع
 
يوراميوم: تمام
 
سياب: يا سيدي ان صح كلامك وانا بشوفو صحيح
 
يوراميوم: مثل مانحنا بيشوفونا الكبار هيك
 
سياب: البشر رح يتحولو الى قطيع كالروبوت
 
سياب: تتم برمجتو وفق ما بدهم اصحاب الوكالات
 
يوراميوم: ومن ناحية ثانية
 
يوراميوم: ورغم أنو هذا الموضوع متفرع وشائك كثير
 
يوراميوم: بس اللغة
 
يوراميوم: جبلي من هذا الجيل حدا بيقدر يكتب 3 سطور ورا بعض بدون 4 أو خمس أخطاء إملائية وشوية نحوية
 
يوراميوم: إن وجدوا هم قلائل
 
يوراميوم: التقنية صارت تشغل الجميع
 
يوراميوم: من كم سنة ماعاد شفت ولد حلمه يشتريله أبوه بسكليت
 
يوراميوم: بالمقابل مستعد يموت ويعيش 100 مرة مقابل كومبيوتر أو جهاز ألعاب
 
يوراميوم: أو موبايل حديث !
 
يوراميوم: النهاية إذا اقتربت فرح تكون على أيدي التقنية 
 
سياب: اي
 
سياب: هو الموضوع بدو خبراء بصراحة وابحاث واحصاءات
 
سياب: بس انت عم تاخد الجانب المظلم من قضية توفر المعلومات
 
يوراميوم: لا لا.. بتتذكر موضوع تتبنى الكومبيوتر إذاً كيف هو خط يدك؟
 
يوراميوم: كان إشارة مبطنة لهذا الشي
 
يوراميوم: حتى لما قرأنا كلنا خبر الجهاز اللي بيتركب على الرأس وبيقرأ إنطباعات الشخص.. ليش ارتعب منه شباب التقنية أكثر من غيرهم اللي اعتبروه شغلة حلوة
 
سياب: اي
 
يوراميوم: هذا الشي رح يقود لمرحلة (إذا وصلوا للسيطرة على الإشارات الدماغية) أنو يستعيضوا عن الدماغ كأداة تخزين لينقلوا هذا الشي للأجهزة .. وممكن العكس (معلش ولو أنو الفكرة حمصية بس صارت قريبة جداً)
 
سياب: لا شريك مو حمصية بنوب
 
سياب: وافلام الخيال العلمي عم تتحق
 
سياب: مقبلين على عصر ال Machines
 
يوراميوم: نحنا ببدايته
 
يوراميوم: والمرحلة الأولى منه هي نقل المعارف البشرية للآلة
 
يوراميوم: حتى الإبداع
 
يوراميوم: من بين 100 رسام ممكن تلاقي هلق 70 واحد بيشتغلو على برامج تصميم ومثلهم النحاتين
 
سياب: الإبداع مرحلة متقدمة وافراز لخبرات ومعارف متراكمة
 
سياب: بقى ممكن جدا
 
يوراميوم: وبياعين الألوان المائية والزيتية وقماش الرسم عم يشتروا برادات بوظة يحطوها على أبواب متاجرهم J
 
سياب: الآلة تصير مبدعة أيضا
 
سياب: فعلا
 
يوراميوم: في فرع بالجامعة بيدرس الذكاء الصنعي وهذا الي لسه بمراحله الأولى وكل ماله عم يتطور وإذا بدي قوله بكلمتين هو “تدريب الآلة على اتخاذ قرارات حكيمة بسرعة “
 
سياب: اي
 
سياب: على فكرة وانت الاخبر مني
 
سياب: هم حاليا عم يدرسو بتعمق كبير المخ  البشري
 
سياب: مشان يحاولو محاكاة آلية عملو ونقلها للكومبيوتر
 
يوراميوم: سنة 1998 في شركات كثير بالبلد كانت عم تبيع تقنية هون بسوريا مشان إدارة بيوت البلاستيك بدون تدخل صاحبها على الاطلاق
 
يوراميوم: وتأكيداً على كلامك .. حسام مرة نقل لي موقع على الانترنت عم يروج لتقنية(برنامج) إذا قدمتله صورة مقتطع منها شقفة بيقدر يكملها لحاله بشكل مقنع جداً
 
سياب: صحيح
 
يوراميوم: بالثمانينات كانوا يقولوا أنو الكومبيوتر هو آلة غبية لا تقدر أن تقدم نتيجة بدون ما تقدملها القواعد والبيانات اللازمة للوصول لها.. هلق الكومبيوتر صار عنده كل القواعد (الآليات) وكل البيانات اللازمة لياخد القرار .. وصارت العبارة اللي عم يتحضرلها حالياً هي
 
يوراميوم: “الانسان كائن حي غبي.. بحاجة للآلة ليصل لقرار مناسب”
 
سياب: المشكلة رامي
 
سياب: انو هيك قضايا
 
سياب: يطلق عليها بالإقتصاد المعاوضة
 
سياب: Trade -off
 
سياب: هاي بتكون معاوضة بين مثلا الخطر والعائد
 
سياب: الناس تحب العائد وتكره الخطر
 
سياب: لكن بازياد الخطر يزداد العائد
 
سياب: الى ان يصل الى نقطة يكون فيها الخطر بأقل حد لأعلى عائد ممكن
 
سياب: واذا ما زدنا الخطر فلن نحصل على عائد اضافي
 
سياب: هاد تماما اللي عم يصير
 
يوراميوم: يمكن مو بالوقت الحالي بس رح نوصلها
 
يوراميوم: بس هذا الشي ماعم يتحقق
 
سياب: لا شريك
 
يوراميوم: الانسان مخلوق تنبل
 
سياب: انت بحاجة للكومبيوتر
 
سياب: لكن في نقطة متى ما تخطيناها يصفي الكومبيوتر خطره اكبر من عائده
 
سياب: متل ما حكيت يخلي التنبلة سمة أساسية
 
سياب: ويؤدي في المستقبل الى سيطرة الآلة فعلا
 
يوراميوم: كل مالي عم أحتاجه أكثر
 
يوراميوم: مو كل الخطر عم يطفو
 
يوراميوم: أنا لما بدي بيعك زيت زيتون ما بحكيلك على المشاكل اللي رافقت نمو حبة الزيتون .. ووقت بعصره بقدملك هالزجاجة وبقعد بحكيلك على مزياها ساعات وإذا كشفتني ممكن أتنازل شوي وخبرك على بعض المشاكل “بشكل مزين” اللي رافقت إنتاج هالزيتات .. لأني مارح وافقك بأنه عكر .. وممكن أوهمك أنو هذا العكر هو دليل على أصالته
 
سياب: اي
 
يوراميوم: نحنا عم نكتفي بفهم العائد أما الأخطار بس تطلع بنلاقيلها مبرر .. (مو حل) أو ممكن نقدم أدوات لتجاوزها لمشاكل أكبر أحياناً
 
يوراميوم: ماعم نبذل جهد لنحيط بالخطر إحاطة كاملة .. ليش؟ لأنو الانسان كائن حي تنبل ما بيهمه يسمع شي بيخوفه على قد مايسمع شي بيبسطه
 
سياب: مضبوط
 
سياب: وفيه نقطة إضافية
 
سياب: انو مو كل المخاطر تكون واضحة ومتبلورة في لحظة اقدامنا على فعل امر معين
 
سياب: نقص المعلومات مصيبة كبيرة
 
يوراميوم: هو مونقص.. هذا هو “الوصول المحدد لمعلومة” اللي بدأت فيه حديثي
 
سياب: لا شريك
 
سياب: فيه هون نقطة اختلاف
 
يوراميوم: تفضل
 
سياب: انا بقصد انت لما تقوم بانتاج شيء ما او اتخاذ قرار معين
 
سياب: تحيط بإيجابياتو وسلبياتو
 
سياب: لكن مع الزمن والإستعمال
 
سياب: تظهر سيئات ما كنا حاسبيلها حساب
 
سياب: ويصبح هالمنتج ضرره أكبر بكثير من فائدته
 
يوراميوم: أنت بتؤمن بفكرة أنو ممكن تنتج شي وما تكون محيط بكل سلبياته؟ أنت تنتج الشيء ومابتبذل المجهود اللازم للإحاطة بالسلبيات، على الأقل بقدر المجهود اللي بتبذله لإبراز وإظهار الإيجابيات
 
يوراميوم: لسببين .. مابيهمك أنو تخوف المستهلك لانتاجك، وماعندك الوقت والجهد الكافي، بيكفي شوية تجارب توصلك لأدنى قناعة بالرضى
 
سياب: لا رامي حتى لو حاولت  الأحاطة بالسلبيات
 
سياب: ما فيك تحيط فيها كلها
 
يوراميوم: إذا أنا بكرهك .. وأنت أنتجت منتج .. رح أبذل مجهود لطلع سلبيات منتجك .. هذا الشي اللي عم يصير بسوق البرمجيات وعم ينجح بشكل مو معقول
 
سياب: تمام
 
سياب: اي
 
يوراميوم: معانتها السلبيات ممكن تطلع بمجهود يأخذ اتجاه مخالف لاتجاهك بالتطوير
 
سياب: تمام
 
سياب: انت بتحكي بشكل واقعي لما هو حاصل
 
يوراميوم: بيجي عضو بيكتب كلمتين بموضوع عن شغلة مالية هات أيدك والحقني
 
يوراميوم: أنت بتقرأه وبتصير كمشرف تدور على نقاط الضعف وبتبرزها .. يمكن لأنو هذا دورك هون بس القارئ العادي رح يقول آمين
 
يوراميوم: هذا مثال قريب
 
سياب: اي
 
سياب: معك
 
يوراميوم: بتعرف شو؟
 
يوراميوم: رح أنشر هذا الحوار كما هو
 
يوراميوم: إذا بتوافق طبعاً
 
سياب: انا كان بدي قلك
 
سياب: قول الله
 
يوراميوم: مارح عيد صياغة الحوار بموضوع .. ما ح يكون بهذه الجودة 
 
يوراميوم: ويمكن لأنو الانسان بطبعه كائن تنبل 
 
سياب: ههههههههه
 
سياب: فيك تكفي فكرتك
 
سياب: وتعطيها شمولية اكتر
 
سياب: وتحاول تعطي مقاربة لحل ما
 
سياب: وكمان قدر الإمكان تاخد الجانب الإيجابي للي عم يصير حاليا مشان تبلور حل منو
 
يوراميوم: مالي شايف حل غير أنو الناس تصحى .. وخاصة الناس اللي رح تقرأ هذا الحوار
 
يوراميوم: رح حاول صيغ موضوع وشوف شو فيني اكتب فيه بس الأفضل انو يسمعوا وجهة نظرنا معاً مثل ماهي
 
سياب: اذا اهلا بأرنولد بالجزء الرابع
 
يوراميوم: أوك أنا رح غادر هلق
 
سياب: وانا كمان
 
سياب: سلام انا
 
يوراميوم: باي
Advertisements

الأوسمة: ,

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s


%d مدونون معجبون بهذه: